Safar-e-manzil-e-shab yaad nahin,
Log rukhsat hue kab yaad nahin.

[rukhsat = to leave]

Dil mein har waqt chubhan rahati thi,

Thii mujhe kis kii talab yaad nahin.

[talab = desire]

Woh sitaaraa thii ke shabanam thii ke phuul,

Ik suurat thii ajab yaad nahin.

[shabanam = dew]

Aaisaa ulajhaa hun gam-e-duniyaa mein,

Ek bhii Khawab-e-tarab yaad nahin.

[tarab = joy]

Bhuulate jaate hain maazii ke dayaar,

Yaad aayein bhii to sab yaad nahin.

[maazii = past; dayaar = place/residence]

Ye haqiiqat hai ke ahabaab ko ham,

Yaad hii kab the ke ab yaad nahin.

[haqiiqat = reality; ahabaab (plural of habiib) = friends]

Yaad hai sair-e-charaagaan "Nasir",

Diye ke bujhane kaa sabab yaad nahin.